Pearl Harbor (títol orichinal, enguerada en Aragón con ixe mesmo títol) ye una cinta de cine estausunidense de l'anyo 2001 de cine belico, cine de drama y cine de romance dirichida por Michael Bay seguntes un guión orichinal de Randall Wallace, con una Banda Sonora Orichinal de Hans Zimmer, una dirección de fotografía de John Schwartzman, una producción cinematografica de Jerry Bruckheimer y Michael Bay ta las productoras cinematograficas Touchstone Pictures y Jerry Bruckheimer Films, y un elenco d'actors formau, en os suyos papels principals, por Ben Affleck, Josh Hartnett, Kate Beckinsale, Cuba Gooding Jr., Tom Sizemore, Jon Voight, Colm Feore y Alec Baldwin.
Pearl Harbor se centra en a vida de dos amigos, Rafe McCawley y Danny Walker, atrayius por o mundo de l'aviación dende ninos y que se troban recient plegaus en a base aeronaval de Pearl Harbor en os anyos 1940, en plena Segunda Guerra Mundial, y conoixen a Evelyn, una enfermera de qui Rafe s'enamora, estando correspondiu. Tanimientres, Rafe marcha voluntario ta luitar contra la Luftwaffe en a Royal Air Force mientres a batalla d'Anglaterra y aparentment i muere, y finalment Evelyn y Danny principian una relación, quedando embarazada la mesacha, chusto cuan torna Rafe; tanimientres toz dos participan baixo lo mando de James H. Doolittle en abril de 1942 en a incursión Doolittle contra lo territorio metropolitano de Chapón. La cinta se rodó en Cambridgeshire, Gloucestershire, Kent y atros puestos d'Anglaterra, en os estaus d'Indiana, Hawaii (incluyindo-ie Honolulu) y Nevada, en as localidaz de Houston y Corpus Christi en Texas y Los Angeles en California y tamién en Mexico, y s'ambienta en 1923 en Tennessee, en 1941 en Honolulu y Pearl Harbor (Hawaii), Nueva York, Washington, DC y Anglaterra y en 1942 en l'oceano Pacifico, Hawaii, Chapón y China. Se tracta d'una cinta con buen exito de publico y que recibió cuantos premios, en destacando un Premio Oscar a la Millor Edición de Soniu en a suya 74ena edición, con atras tres nominacions (Millor Canción Orichinal, Millor Soniu y Millors Efectos Visuals) y dos nominacions a los Premios Globos d'Oro en a suya 59ena edición (Millor Guión Orichinal y Canción Orichinal).